B-Kid (3-6 years Course)

ຫຼັກສູດ YOUER HANYU 

ຫຼັກສູດ YOU’ER HANYU ເປັນຫຼັກສູດຂອງນັກຮຽນລຸ້ນອາຍຸ 3-6 ປີ ເຊິ່ງຫຼັກສູດນີ້ຈະເໝາະ ສຳລັບນັກຮຽນຕ່າງປະເທດຕັ້ງແຕ່ລະດັບອານຸບານ ຫາປະຖົມ, ຫຼັກສູດດັ່ງກ່າວຖືກຮອງຮັບຈາກ ສະມາຄົມພົວພັນຕ່າງປະເທດຂອງຈີນ (China Overseas Exchange Association) ແລະ ຮຽບຮຽງໂດຍວິທະຍາໄລຫົວເຫວີນນະຄອນຫຼວງປັກກິ່ງ (Beijing Chinese Language and Culture College), ເປັນຫຼັກສູດທີ່ນໍາໃຊ້ຫຼາຍທີ່ສຸດໃນຂອບເຂດທົ່ວໂລກ ໂດຍສະເພາະແມ່ນຢູ່ໃນປະເທດລາວ, ອອກແບບສະເພາະໃຫ້ແກ່ນັກຮຽນຕ່າງປະເທດທີ່ຕ້ອງການ ຮຽນຮູ້ພາສາ ແລະ ວັດທະນະທໍາຈີນ. ຫຼັກສູດ YOU’ER HANYU ມີທັງໝົດ 4 ເຫຼັ້ມ, ເຊິ່ງປະກອບມີ ບົດຮຽນ ເເລະ ເເບບເຝິກຫັດນຳກັນ ໃນໂຕ.

YOUER HANYU ເຫຼັ້ມທີ 1-4, ໃຊ້ເວລາທັງໝົດປະມານ 3 ປີ ນັກຮຽນທີ່ຜ່ານຫຼັກສູດດັ່ງກ່າວ ຈະມີລະດັບພາສາຈີນທີ່ເເຫນັ້ນຂຶ້ນກຽມພ້ອມທີ່ຈະຕໍ່ລະຫລັກສູດ ZHONGWEN . ລະດັບພາສາຈີນ ຂອງນັກຮຽນຈະທຽບເທົ່າກັບ HSK2.

ຈຸດພິເສດຂອງຫຼັກສູດຂອງສູນເຮົາແມ່ນຈະເນັ້ນການປູກຝັງຄວາມຄຸ້ນເຄີຍກັບພາສາຈີນຕັ້ງແຕ່ເລີ່ມຕົ້ນ ແລະ ເພີ່ມການສົນທະນາກັນໃນຫ້ອງຮຽນໃຫ້ຫຼາຍຂຶ້ນ ເພື່ອໃຫ້ນັກຮຽນມີຄວາມກ້າໃນການເວົ້າ ແລະ ສື່ສານເປັນພາສາຈີນຕັ້ງແຕ່ຍັງນ້ອຍ. ນອກນັ້ນ, ຍັງໄດ້ຮຽນຮູ້ຄວາມເປັນມາຂອງຕົວອັກສອນຈີນ ຈາກຮູບພາບ ແລະ ການເຝິກແອບການຂຽນເພື່ອເປັນເຝິກການຈື່ຈຳຕົວອັກສອນຈີນ. ຊ່ວງໄລຍະນີ້ ຈະເປັນໄລຍະທີ່ຫັນຈາກການເພິ່ງອາໄສພິນຍິນ (pinyin) ເພື່ອຊ່ວຍໃນການອອກສຽງມາເປັນການເນັ້ນ ຕົວອັກສອນຈີນເປັນຫຼັກ ເພີ່ມທັກສະການອ່ານ, ການຂຽນຕົວອັກສອນຈີນໃຫ້ຍົກລະດັບຂຶ້ນ ແລະ ຊ່ວຍໃຫ້ນັກຮຽນຊຶມຊັບເຂົ້າໃຈເຖິງຄວາມເປັນພາສາຈີນຫຼາຍຍິ່ງຂຶ້ນ, ເປັນການສ້າງພື້ນຖານທີ່ເຂັ້ມແຂງ ໃຫ້ແກ່ນັກຮຽນໃນການຈະໄປເຊື່ອມຕໍ່ຫລັກສູດ ZHONGWEN.

ການຈັດແບ່ງລະດັບການຮຽນ

     ການຮຽນແມ່ນຈະແບ່ງອອກເປັນ 4 ລະດັບ YOU’ER HANYU 1 – 4 ແຕ່ລະເຫຼັ້ມແມ່ນຈະ ໃຊ້ເວລາເທົ່າກັນ ກໍຄືໜຶ່ງເຫຼັ້ມໃຊ້ເວລາຮຽນ 3 ເທີມ (9 ເດືອນ).

     ສະຫລຸບການຮຽນຈະໃຊ້ເວລາທັງໝົດປະມານ 3 ປີໃນການຮຽນຈົບຫລັກສູດ YOU’ER HANYU ຫລັງຈາກຮຽນຈົບ ນັກຮຽນຈະສາມາດຮູ້ຄຳສັບພາສາຈີນປະມານ 240 ຄຳທຽບເທົ່າກັບລະດັບ HSK 2, ມີຄວາມຮູ້ທາງດ້ານວັດທະນະທຳ, ກາບກອນຈີນ, ຮ້ອງເພັງເດັກນ້ອຍຈີນ, ແລະ ຄຳສັບທົ່ວໄປໃນຊີວິດ ປະຈຳວັນ.

ໂປແກມການຮຽນ

ໂປແກມການຮຽນຂອງພວກເຮົາຖືກອອກແບບມາເພື່ອຕອບສະໜອງຄວາມຕ້ອງການຂອງນັກ ຮຽນ ແລະ ສອດຄ່ອງຕໍ່ຄຸນລັກສະນະຂອງນັກຮຽນ, ເພາະພວກເຮົາແນເຫັນຄວາມສຳຄັນຂອງການຮຽນ ທີ່ມີຄວາມຕໍ່ເນື່ອງ ແລະ ພ້ອມກັນນັ້ນ ເພື່ອຍົກລະດັບຄຸນນະພາບຂອງການຮຽນເພີ່ມພາສາ ໃຫ້ມີປະສິດ ທິພາບສູງສຸດ ຈຶ່ງມີການຈັດແບ່ງໂປແກມອອກມາເປັນ 2 ແບບຄື:

1.ໂປແກມ 2+2 ແມ່ນຮຽນ Offline ໃນວັນເສົາ ແລະ ອາທິດ (1.5 ຊົ່ວໂມງ/ມື້) ບວກກັບການຮຽນ Online ໃນວັນອັງຄານ ແລະ ພະຫັດ(30 ນາທີ/ມື້) ລວມທັງໝົດ 4 ຊົ່ວໂມງ/ອາທິດ. ເທີມໜຶ່ງໃຊ້ເວລາ 3 ເດືອນ

2.ໂປແກມ 3 ແມ່ນຮຽນ Offline ໃນວັນທໍາມະດາ 3 ມື້/ອາທິດ ຈັນ, ພຸດ, ສຸກ ຫຼື ອັງຄານ, ພະຫັດ, ເສົາ (1.5 ຊົ່ວໂມງ/ມື້) ລວມທັງໝົດ 4.5ຊົ່ວໂມງ/ອາທິດ. ເທີມໜຶ່ງໃຊ້ເວລາ 3 ເດືອນ

ຮູບເເບບການສອນຂອງພວກເຮົາເເມ່ນມີຄວາມເເຕກຕ່າງຈາກທຸກໆສະຖາບັນການສຶກສາໃນ ປະເທດລາວ, ເພາະພວກເຮົານຳໃຊ້ການສອນເເບບ 2 ລະບົບ ນັ້ນກໍຄືການສອນ Offline (ການສອນໃນຫ້ອງຮຽນ), ຄຽງຄູ່ກັບການສອນ Online (ການຮຽນຜ່ານລະບົບເຕັກໂນໂລຊີທີ່ທັນສະໄຫມ ໂດຍນຳໃຊ້ຄອມພິວເຕີ້ ຫລື ສະມາດໂຟນທີ່ມີອີນເຕີເນັດ).

ການສອນ Offline ແມ່ນການສອນໃນຫ້ອງຮຽນ ສອນໂດຍອາຈານຈີນເຈົ້າຂອງພາສາ ຮ່ວມກັບ ອາຈານຜູ້ຊ່ວຍທີ່ສາມາດເວົ້າພາສາຈີນໄດ້. ເພື່ອຮັບປະກັນຄຸນນະພາບຂອງການຮຽນ ເເລະ ການໃສ່ໃຈ ນັກຮຽນຢ່າງທົ່ວເຖິງ, ການຮຽນຂອງພວກເຮົາຈະເນັ້ນການເສີມສ້າງແຮງບັນດານໃຈໃນການມັກຮັກ ພາສາຈີນ ດ້ວຍວິທີການສອນທີ່ມີຄວາມມ່ວນຊື່ນຜ່ານກິດຈະກຳທີ່ແຊກຊ້ອນເນື້ອໃນບົດຮຽນໄປໃນໂຕ ເຊັ່ນ: ການອ່ານນິທານ, ການຮ້ອງເພງ, ການສະແດງລະຄອນ, ການຮຽນຂຽນພູ່ກັນ, ການເຮັດຫັດຖະ ກຳ, ການເຮັດບົດເຝິກຫັດຕາມຕໍາລາຮຽນ, ເຊິ່ງຈະເປີດໂອກາດໃຫ້ນັກຮຽນໄດ້ປະຕິບັດ ແລະ ນໍາໃຊ້ ພາສາຕົວຈິງ ເປັນເວທີໃຫ້ນັກຮຽນ ກ້າສະແດງອອກໃນການນໍາໃຊ້ພາສາ.

ການສອນ   Online ແມ່ນການສອນຜ່ານລະບົບເຕັກໂນໂລຊີທີ່ທັນສະໄຫມໂດຍການນຳໃຊ້ ຄອມພິວເຕີ້ ຫລື ສະມາດໂຟນທີ່ມີອີນເຕີເນັດ, ເຊິ່ງຖືກອອກແບບມາເພື່ອການທວນຄືນບົດຮຽນໃຫ້ແກ່ ໂປແກມ 2+2 ເຮັດໃຫ້ການສອນມີຄວາມຕໍ່ເນື່ອງ ແລະ ມີປະສິດທິພາບສູງຂຶ້ນ. ຈາກການທີ່ໄດ້ນຳໃຊ້ ເທັກໂນໂລຊີເຂົ້າໃນການສິດສອນພາສາ ສະເເດງໃຫ້ເຫັນວ່ານັກຮຽນທີ່ໄດ້ຮຽນຜ່ານທາງ Online ຄຽງຄູ່ໄປກັບການຮຽນ Offline ແມ່ນມີພັດທະນາການດ້ານພາສາໄວກວ່ານັກຮຽນທີ່ຮຽນພຽງເເຕ່ Offline ຢ່າງດຽວເຖິງ 30%. ການເກັບກຳຜົນດັ່ງກ່າວແມ່ນໄດ້ມາຈາກສູນສອນພາສາອັງກິດໃຫ້ ເດັກນ້ອຍຈີນ ທີ່ສູນ A-YO 国际少儿英语 ເຊິ່ງໄດ້ນຳໃຊ້ລະບົບສອນ Online ຄຽງຄູ່ໄປກັບການສອນ Offline ເປັນເວລາ 5 ປີ ແລະ ມັນຍັງໄດ້ຜົນຕອບຮັບທີ່ດີຫລາຍຈາກທາງນັກຮຽນ, ຜູ້ປົກຄອງ ລວມທັງ ອາຈານ.

ການໃຫ້ດາວແຮງບັນດາໃຈ

ພວກເຮົາໄດ້ມີລະບົບການສະສົມຄະແນນ(ດາວ)ສໍາລັບນັກຮຽນ ເພື່ອເສີມສ້າງແຮງບັນດານໃຈ ໃນການຮຽນພາສາດ້ວຍການສະສົມຄະແນນຈາກການປະພຶດໂຕທັງໃນຫ້ອງຮຽນ Offline ແລະ Online, ອາຈານສາມາດໃຫ້ຄະແນນນັກຮຽນໂດຍອີງໃສ່ມາດຕະຖານການໃຫ້ຄະແນນດັ່ງນີ້:

1.ນັກຮຽນມາຮຽນຕົງໂມງ.

2.ນັກຮຽນມີສ່ວນຮ່ວມໃນຫ້ອງຮຽນເຊັ່ນຍົກມືຕອບຄຳຖາມ ແລະ ອື່ນໆ.    

3.ນັກຮຽນປະພຶດຕົນດີໃນຫ້ອງຮຽນ.

4.ນັກຮຽນຊ່ວຍເຫລືອນັກຮຽນຜູ້ອື່ນ.

5.ຄະເເນນວຽກບ້ານ.

6.ການປະພຶດອື່ນໆທີ່ອາຈານເຫັນວ່າສົມຄວນ.

ລະບົບການສະສົມຄະແນນ(ດາວແຮງບັນດາໃຈ) ມີໄວ້ເພື່ອຫຍັງ?

ລະບົບການສະສົມຄະແນນບໍ່ໄດ້ເປັນຜົນຊີ້ວັດຄຸນນະພາບການຮຽນຂອງນັກຮຽນ, ແຕ່ເປັນວິທີ ການໜຶ່ງເພື່ອດຶງສັກກະຍາພາບແຕ່ລະຈຸດຂອງນັກຮຽນອອກມາ, ຜັກດັນສະໜັບສະໜຸນຈຸດເດັ່ນຂອງ ນັກຮຽນໃຫ້ດີຂຶ້ນເລື້ອຍໆ ໃຫ້ນັກຮຽນຢາກຈະສືບຕໍ່ປະຕິບັດໃນສິ່ງທີ່ດີ ແລະ ຖືກຕ້ອງ, ຫລຸດຜ່ອນຈຸດອ່ອນຂອງນັກຮຽນໃຫ້ປັບປຸງພັດທະນາໄປພ້ອມໆກັນ, ເປັນການເຝິກຝົນຫຼໍ່ຫຼອມຄຸນສົມບັດ ແລະ ການປະພຶດໂຕຂອງນັກຮຽນຕັ້ງແຕ່ໄວຍັງເດັກ. ເມື່ອນັກຮຽນໄດ້ມີການສະສົມຄະເເນນດາວຈົນຮອດ ທ້າຍເທີມຈະມີການເເລກຂອງຂວັນອີງໃສ່ຄະເເນນທີ່ນັກຮຽນມີເຊິ່ງທາງອາຈານເເມ່ນຈະມີປື້ມລາຍການຂອງຂວັນໃຫ້ນັກຮຽນເລືອກໄວ້.

ການສອບເສັງ ແລະ ການມອບໃບຢັ້ງຢືນ

ສຳລັບເດັກ 3-6ປີ ຫຼັງຈາກຮຽນຈົບແຕ່ລະເທີມແມ່ນຈະມີການປະເມີນພັດທະນາການ ດ້ານການຮຽນ ແລະ ທັກສະແຕ່ລະດ້ານເຊັ່ນ: ການເວົ້າ, ການຂຽນ, ການອ່ານ, ການຟັງ ແລະ ການເຮັດກິດຈະກຳ; ແລະ ຈະມີການມອບໃບຄະແນນໃຫ້ນັກຮຽນ. ຫຼັງຈາກຮຽນຈົບແຕ່ລະເຫຼັ້ມ ຈະມີການມອບໃບຢັ້ງຢືນການຮຽນ ແລະ ໃບຍ້ອງຍໍໃຫ້ກັບນັກຮຽນທຸກຄົນ.

ໃບຍ້ອງຍໍປະເພດຕ່າງໆ

ລະບົບການໃຫ້ໃບຍ້ອງຍໍປະເພດຕ່າງໆແມ່ນເປັນການສັງເກດລັກສະນະນິໄສຂອງນັກຮຽນແຕ່ລະຄົນ ແລ້ວຍົກສູງ, ເນັ້ນຢໍ້າຈຸດດີຂອງນັກຮຽນທີ່ນອກເໜືອຈາກດ້ານການຮຽນ ບໍ່ວ່າຈະເປັນຈຸດດີ ດ້ານຄຸນສົມບັດ, ດ້ານພຶດຕິກຳຕ່າງໆ ເຊິ່ງເປັນອີກວິທີການໜຶ່ງໃນການສ້າງແຮງບັນດານໃຈໃຫ້ແກ່ ນັກຮຽນ, ເພື່ອໃຫ້ນັກຮຽນຮູ້ສຶກພາບພູມໃຈ ແລະ ມີກໍາລັງໃຈໃນການສະແດງຈຸດເດັ່ນຂອງຕົນເອງ ອອກມາ. ພວກເຮົາຈະມອບລາງວັນນີ້ທຸກໆການຮຽນຈົບຕຳລາໜຶ່ງເຫຼັ້ມ ເຊິ່ງຈະແນໃສ່ຈຸດເດັ່ນດ້ານພຶດຕິກຳຂອງນັກຮຽນ, ຕົວຢ່າງຂອງລາງວັນຈະເປັນໃນລັກສະນະນີ້:

- ລາງວັນພັດທະນາການດີເດັ່ນ.

- ລາງວັນການປະພຶດດີເດັ່ນ.

- ລາງວັນກ້າສະແດງອອກ.

- ລາງວັນຄວາມເປັນຜູ້ນໍາ.

- ລາງວັນຂະຫຍັນພຽນ.

- ລາງວັນກະຕັນຍູ.

- ລາງວັນມາລະຍາດດີເດັ່ນ.

- ລາງວັນຊ່ວຍເຫຼືອຜູ້ອື່ນ.

- ລາງວັນອື່ນໆທີ່ອາຈານເຫັນວ່າເປັນອັນຄວນທີ່ຈະມອບໃຫ້.

ການເສັງທຽບວັດລະດັບ

ສຳລັບນັກຮຽນທີ່ເຂົ້າມາກາງຄັນ ແມ່ນພວກເຮົາຈະມີການປະເມີນຄວາມຮູ້ພື້ນຖານ ດ້ານພາສາຈີນຂອງນັກຮຽນໃນເບື້ອງຕົ້ນ ແລະ ຈະຈັດສັນຫ້ອງທີ່ເໝາະສົມກັບນັກຮຽນ ໃຫ້ນັກຮຽນໄດ້ທົດລອງຮຽນຮ່ວມກັບໝູ່ໃນຫ້ອງ, ຫຼັງຈາກນັ້ນ ອາຈານຂອງພວກເຮົາຈະປະເມີນລະດັບຂອງນັກຮຽນ ເພື່ອຈັດນັກຮຽນ ເຂົ້າໃນຫ້ອງທີ່ເໝາະກັບລະດັບພາສາຂອງນັກຮຽນ.

ກຸ່ມນັກຮຽນ

         ກຸ່ມນັກຮຽນທີ່ເໝາະກັບຫຼັກສູດນີ້ແມ່ນ ເດັກນ້ອຍ 3-6 ປີ ທີ່ຫຼັງຈາກຈົບຫຼັກສູດນີ້ນັກຮຽນຈະມີ ອາຍຸປະມານ 6-9 ປີ ແມ່ນສາມາດຕໍ່ Zhongwen ໄດ້.